సినిమాపేరు : వాన || సంగీత దర్శకుడు : కమలాకర్ || గీత రచయిత : సిరివెన్నెల సీతారామ శాస్త్రి || పాడిన వారు : మల్లికార్జున్
పల్లవి :
మూతి ముడుచుకున్నదే మువ్వంటి మైన
అరె మబ్బేల దిగనంది ముత్యాల వాన
మాట వరసకైనా తనకు చెప్పనంటు
గీటుదాటకన్నా లెక్కచేయనంటు
ఆమె గారి చేయి జారి మనసు గాని పారిపోయిందా ఏమైనా
రానందా రమ్మన్నా
చరణం 1
సన్నాయిలా వినిపిస్తున్నవా చెవికొరికి పోయే చిరుగాలులు
జడివానలా అనిపిస్తున్నవా జడపూల చాటున తడి ఊహలు
ఇన్నాళ్ళు నువ్వైన చూసావటే నీక్కూడ ముద్దొచ్చే అందాలు
ఇవ్వాళె నీకు తెలిసాయటే ఛీపాడు అనిపించు అర్ధాలు
ఇంతలో ఇంతలా ఎంత వింత మార్పు వచ్చిందే నీలోన
బాగుందే ఏమైనా
చరణం 2
ఉయ్యాలకే ఉలుకొచ్చిందట ఒళ్ళోంచి నువ్వు దిగి వెళ్ళావని
పట్టీల అడుగే అలిగిందట చెట్టెక్కడం మానుకున్నావని
పైటొచ్చి నీ జట్టు కట్టుకుందనీ ఆటాడె ఈడింక చేరనన్నది
పారాణి కేమంత బరువుందని పాదాన్ని పరిగెత్తనీయకున్నది
గుండెలో గువ్వలా తెంచుకున్న నిన్ను పిలిచిందే ఓ మేన
పంపాలే ఏమైనా
మూతి ముడుచుకున్నదే మువ్వంటి మైన
అరె మబ్బేల దిగనంది ముత్యాల వాన
మాట వరసకైనా తనకు చెప్పనంటు
గీటుదాటకన్నా లెక్కచేయనంటు
ఆమె గారి చేయి జారి మనసు గాని పారిపోయిందా ఏమైనా
రానందా రమ్మన్నా
